महेश सिंह लहान सिरहा,सिरहाको लहान नगरपालिका–२ स्थित लहान गोल्डन फ्युचर एजुकेशनल एकेडेमीले नयाँ शैक्षिक सत्र २०८३ का नवभर्ना विद्यार्थीलाई औपचारिक रूपमा स्वागत गर्दै विशेष कार्यक्रम सम्पन्न गरेको छ। विद्यालयले नयाँ विद्यार्थीमा आत्मविश्वास अभिवृद्धि गर्ने र विद्यालयप्रति अपनत्वको भावना विकास गर्ने उद्देश्यले स्वागत कार्यक्रम आयोजना गरेको जनाएको छ।
कार्यक्रममा नवभर्ना विद्यार्थीलाई माला तथा खादा लगाएर सम्मानपूर्वक स्वागत गरिएको थियो। साथै स्थानीय कला–संस्कृतिलाई झल्काउने सांस्कृतिक प्रस्तुतिमार्फत नयाँ शैक्षिक सत्रको शुभारम्भलाई उत्साहपूर्ण बनाइएको थियो।
विद्यालयका संस्थापक प्रिन्सिपल उपेन्द्र प्रसाद यादवका अनुसार शैक्षिक सत्र २०८३ मा विद्यालयमा ११२ जना नयाँ विद्यार्थी भर्ना भएका छन्। हाल विद्यालयमा कुल ४०० विद्यार्थी अध्ययनरत रहेका छन्।
उहाँले विद्यालयले गुणस्तरीय शिक्षा, अनुशासित शैक्षिक वातावरण तथा विद्यार्थीको सर्वाङ्गीण विकासलाई प्राथमिकतामा राख्दै आएको उल्लेख गर्दै अभिभावकको विश्वासलाई अझ मजबुत बनाउने गरी शैक्षिक गतिविधि सञ्चालन गरिने बताउनुभयो।
कार्यक्रममा शिक्षक, विद्यार्थी, अभिभावक तथा विद्यालय व्यवस्थापन समितिका प्रतिनिधिहरूको सहभागिता रहेको थियो। सहभागीहरूले स्वागत कार्यक्रमले नयाँ विद्यार्थीमा सकारात्मक ऊर्जा र विद्यालयप्रतिको आत्मीयता बढाएको प्रतिक्रिया दिएका थिए।
विद्यालयले आगामी दिनमा पनि शैक्षिक गुणस्तर सुधारसँगै विद्यार्थीको प्रतिभा, नेतृत्व क्षमता र सिर्जनशीलता विकास गर्ने कार्यक्रमलाई निरन्तरता दिने जनाएको छ।
