महेश सिंह, लहान – सिरहा निर्वाचन क्षेत्र नम्बर–१ मा यसपटक चुनावी प्रतिस्पर्धा शैलीगत रूपमा पनि रोचक बन्दै गएको छ। परम्परागत नारामुखी सभा र शक्ति प्रदर्शनभन्दा फरक ढंगले जनमत पार्टी का उम्मेदवार रामस्वरुप चौधरीले “शान्त संवाद, गहिरो बहस” को रणनीति अघि सारेका छन्।
लहान नगरपालिका–२४ का विभिन्न टोलमा उनले ठूलो आमसभाभन्दा सीमित सहभागिताको अन्तरक्रियालाई प्राथमिकता दिएका छन्। भीड संख्याभन्दा छलफलको गुणस्तरमा जोड दिँदै चौधरीले स्थानीय समस्याको लिखित अभिलेख तयार पार्ने अभ्यास थालेका छन्। उनका सहयोगीहरूले प्रत्येक भेटघाटपछि उठेका विषयलाई वर्गीकरण गरी प्राथमिकता सूची बनाइरहेका छन्।
विशेषगरी युवावर्गसँगको छलफलमा रोजगारी र सीप विकास मुख्य मुद्दाका रूपमा उठेको छ। धेरै युवाले वैदेशिक रोजगारी बाध्यता भएको गुनासो गरेका छन्। कृषकहरूले मल–बीउको उपलब्धता, उत्पादन लागत र बजार व्यवस्थापनमा सरकारी हस्तक्षेप कमजोर भएको बताएका छन्। महिलाहरूले साना व्यवसायका लागि सहुलियत ऋण र तालिम विस्तारको माग गरेका छन्।
चौधरीले आफूलाई “मुद्दा बोक्ने प्रतिनिधि” का रूपमा प्रस्तुत गर्दै भने, “हामी वाचा कम, कार्ययोजना बढी प्रस्तुत गर्न चाहन्छौं। मतदाताले अहिले परिणाम चाहेका छन्।” उनले निर्वाचनलाई नीति बहसको अवसरका रूपमा लिनुपर्ने धारणा राख्दै स्थानीय अर्थतन्त्र सुदृढीकरणलाई पहिलो प्राथमिकता दिएका छन्।
राजनीतिक वृत्तमा चौधरीको यो शैलीलाई रणनीतिक परिवर्तनका रूपमा हेरिएको छ। शक्ति प्रदर्शनमा केन्द्रित परम्परागत अभ्यासभन्दा बाहिर निस्केर सघन घरदैलो र विषयगत छलफलमा जोड दिनुले नयाँ मतदाता समूह आकर्षित गर्न सक्ने आकलन गरिएको छ।
यसरी सिरहा–१ मा चुनावी माहोल केवल नारामा सीमित नरही, स्थानीय मुद्दाको दस्तावेजीकरण र प्राथमिकता निर्धारणतर्फ उन्मुख हुँदै गएको देखिन्छ। चौधरीको अभियानले कति प्रभाव पार्छ भन्ने निर्णय भने अन्ततः मतदाताको हातमै ।
